Birgir Jónsson, fyrrum framkvæmdastjóri Iceland Express og síðar aðstoðarforstjóri Wow Air, tók við sem forstjóri Play í gær. Flugrekstrarleyfi félagsins hefur ennþá ekki verið gefið út en forsenda fyrir þess háttar leyfisveitingu er að Play hafi að minnsta kosti eina þotu til umráða.
Þrjár Airbus þotur eru fráteknar fyrir Play líkt og Túristi greindi frá í byrjun síðustu viku. Þær eru allar af gerðinni A321neo og í eigu AerCap, stærstu flugvélaleigu í heimi.
Play þarf að reiða fram 4,5 milljónir dollara, um 580 milljónir króna, fyrir að fá þoturnar afhentar samkvæmt heimildum Túrista. Stærsti hluti upphæðarinnar er trygging sem leigutaki fær endurgreidda þegar þotunum er skilað.
Leigusamningurinn gerir ráð fyrir að Play greiði eingöngu fyrir hvern floginn klukkutíma en þau kjör gilda þó aðeins fyrstu mánuði leigutímans. Þar með getur Play stillt áætlun sinni í hóf í upphafi á meðan eftirspurnin er að byggjast upp.
Pláss til að fjölga sætunum um borð
Flugvélarnar þrjár eru allar framleiddar árið 2018 og voru í flugflota mexíkóska lágfargjaldaflugfélagsins Interjet þar til í apríl í fyrra. Þá tók eigandinn við þeim á ný. Nokkru síðar varð flugfélagið gjaldþrota.
Þó Interjet hafi verið lággjaldaflugfélag þá var óvenju rúmt um farþega þess. Í þotunum sem Play er með vilyrði fyrir voru aðeins 192 sæti en til samanburðar komast 230 farþegar í þotur Wizz Air sem eru af sömu tegund. Hjá WOW air voru sætin í þessari flugvélategund 200 til 218.
Fréttablaðið sagði frá því í gær að fjármögnun Play væri í höfn. Heimildir Túrista herma hins vegar að ennþá eigi eftir að selja hluta af þessu nýja hlutafé.
