Dagný Pétursdóttir, framkvæmdastjóri Sky Lagoon, svarar hér nokkrum spurningum Túrista um kynningarstarfið, samkeppnina og komandi ferðamannasumar.
Hvernig hafa viðtökurnar verið frá opnun?
Við erum í skýjunum yfir viðtökunum. Það er vandrataður vegur að hanna og reka upplifun eins og Sky Lagoon. Maður veit í raun aldrei fyrr en gestir koma á svæðið hversu vel hefur tekist til við að búa til umhverfi og upplifun sem fólki líkar vel við. Jákvæð endurgjöf gesta er mikilvægasti mælikvarðinn á því hvernig okkur gengur og veitir okkur kraft til að gera enn betur. Viðtökur hafa farið fram úr björtustu vonum og fyrir það erum við gríðarlega þakklát.
Hvaða leiðir farið þið til að koma ykkur á framfæri hjá ferðamönnum? Við erum í góðu sambandi við okkar samstarfsaðila í greininni og margir þeirra hafa komið og upplifað Sky Lagoon. Við teljum því að þeir geti mælt heilshugar með heimsókn í Sky Lagoon við sína viðskiptavini. Gott samstarf við önnur ferðaþjónustufyrirtæki er okkur gríðarlega mikilvægt.
Má gera ráð fyrir að ferð til ykkar komi í staðinn fyrir heimsókn í önnur baðlón, bæði vegna takmarkaðs tíma sem fólk hefur og svo kostnaðar?
Við trúum því að Sky Lagoon muni stækka kökuna umtalsvert. Þó svo að baðstaðir byggja allir á upplifun í heitu vatni þá eru þeir ólíkir og með sína sérstöðu. Einnig þarf að skoða svæðisbundna afþreyingarmöguleika óháð eðli starfseminnar. Tíminn verður svo að leiða í ljós hvernig mynstrið verður varðandi fjölda heimsókna og annað.
Hvaða þjóðir teljið þið líklegastar til að heimsækja Sky Lagoon?
Fyrir utan Íslendinga gerum við ráð fyrir að það verði Bandaríkjamenn og Bretar. Það voru stærstu markaðirnir fyrir Covid og það eru þau lönd sem eru komin lengst í bólusetningum. Við mælum mikinn áhuga frá báðum þessum mörkuðum.
Hvað reiknið þið með að hver gestur stoppi lengi?
Það fer eitthvað eftir árstíðum, tíma dags og veðurfari. Hingað til hefur dvalartími verið lengri en við gerðum ráð fyrir. Við lítum jákvæðum augum á það þar sem þetta er góður mælikvarði á hve vel gestum okkar líður hjá okkur.
Hafið þið hug á að bjóða upp á eigin sætaferðir, t.d úr miðborginni?
Við höfum ekki hugsað okkur að starfrækja sætisferðir sjálf en erum að skoða reglubundinn akstur til og frá miðbænum með okkar samstarfsaðilum. Það ætti að vera komin góð mynd á það fyrir hásumar.