Farþegum á Keflavíkurflugvelli fækkaði um 93 prósent fyrstu fjóra mánuði ársins og veltan í verslununum í Flugstöð Leifs Eiríkssonar hefur því skiljanlega dregist mjög mikið saman.
Þannig nam kortavelta í tollfrjálsri verslun hér á landi, fyrstu fjóra mánuði ársins, aðeins 271 milljón samkvæmt tölum Rannsóknarseturs verslunarinnar. Á sama tíma í fyrra var upphæðin 19,6 milljarðar króna jafnvel þó ferðalög milli landa hafa legið niðri stóran hluta af mars og allan apríl.
Þeir sem hafa verslað í Flugstöð Leifs Eiríkssonar í ár hafa þó eytt töluvert meiru en þeir sem voru á ferðinni í fyrra. Þannig nam meðaleyðsla á hvern farþega á Keflavíkurflugvelli 3.908 krónum fyrstu fjóra mánuði ársins í ár. Á sama tíma í fyrra var upphæðin 1.976 krónum samkvæmt útreikningum Túrista.
Ein helsta skýringin á þessu kann að liggja í því að nú er hlutfall íslenskra farþega mun hærra en vanalega. Sá hópur farþega er nefnilega líklegri til að kaupa áfengi í Fríhöfninni en þeir erlendu.