Það er viðbúið að áhugi Norðmanna á fasteignum á Spáni muni aukast hratt nú þegar slakað verður á ferðatakmörkunum. Þetta er mat sérfræðinga norska bankans DNB en sá, líkt og margir aðrir stórir skandinavískir bankar, veitir lán til húsnæðiskaupa á Spáni og víðar í suðurhluta Evrópu.
Áfram verða Íslendingar hins vegar að treysta á spænskar fjármálastofnanir þegar kemur að fasteignaviðskiptum á Spáni. Því samkvæmt svörum frá Íslandsbanka, Arion banka og Landsbankanum þá er ekki á stefnuskrá bankanna þriggja að veita fasteignalán í útlöndum. Áfram verður einblínt á fjármögnun á íbúðahúsnæði hér á landi.
Á sama tíma reka bankar eins og Handelsbanken í Svíþjóð og Nykredit í Danmörku útibú á Spáni, t.d. á Marbella og á Mallorca.
Og það eru ekki bara skandinavískir bankar sem hafa haslað sér völl í suðurhluta Evrópu. Þar eru líka að finna skrifstofur á vegum umsvifamestu fasteignasala Noregs, Svíþjóðar og Danmerkur.
Ein af þeim er hin sænska Bjurfors en á heimasíðu hennar segir að kosturinn við að fjármagna fasteignakaup á Spáni í gegnum sænska banka sé sá að vextirnir geti verið hærri hjá þeim spænsku. Á sama tíma geri bankar á Spáni kröfu um að búið sé að greiða upp lánið við 70 til 75 ára aldur.
Íslendingar í fasteignahugleiðingum á Spáni geta leitað til íslenskra fyrirtækja sem sérhæfa sig í fasteignaviðskiptum þar í landi.