Samgöngur milli Íslands og höfuðborgar Ítalíu hafa lengi verið mjög takmarkaðar. Vueling og Wow Air spreyttu sig flugleiðinni tvö sumur og þarsíðasta vetur flugu þotur Norwegian frá Róm til Keflavíkurflugvallar tvisvar sinnum í viku.
Nú ætlar Wizz Air að taka upp þráðinn og fljúga hingað frá Fiumicino flugvelli, í útjaðri Rómar, þrisvar í viku allt árið um kring.
Þessi viðbót á vegum Wizz Air gæti skilað nærri milljarði króna í aukinni kortaveltu ítalskra ferðamanna hér á landi næsta vetur.
Reynslan af skammlífu vetrarflugi Norwegian frá Róm var nefnilega sú að kortavelta ítalskra ferðamanna jókst um 263 milljónir króna á fyrstu þremur mánuðum ársins 2019 í samanburði við sama tímabili árið á undan. Þá var nefnilega ekkert vetrarflug var í boði hingað frá Ítalíu. Hlutfallslega nam hækkunin 39 prósentum samkvæmt tölum Rannsóknarseturs verslunarinnar.
Á þessum þriggja mánaða tímabili flugu þotur Norwegian 26 ferðir til Íslands frá Róm samkvæmt talningu Túrista. Viðbótareyðsla Ítalanna nam því að jafnaði um tíu milljónum króna á hverja ferð.
Ef farþegar Wizz air verða álíka eyðsluglaðir þá mun kortavelta þeirra nema rétt um milljarði króna frá október næstkomandi og fram í lok apríl á næsta ári. Wizz air ætlar nefnilega að bjóða upp á tíðari ferðir en Norwegian gerði og með stærri þotum.
Eins og gefur að skilja þá gefa svona útreikningar aðeins vísbendingu um það sem koma skal. Það ber einnig að hafa í huga að gengi krónunnar, gagnvart evru, var veikara á fyrstu mánuðum 2019 en það hafði verið árið áður.
Það eru þó mörg dæmi um að nýjar flugleiðir leiða til aukinnar kortaveltu og nærtækt dæmi er stóraukin eyðsla spænskra ferðamanna hér yfir vetrarmánuðina þegar Norwegian flaug hingað frá Madríd, Barcelona og Alicante.
Það var ekki eingöngu kortavelta ítalskra ferðamanna sem jókst með vetrarferðum Norwegian frá Róm. Á fyrsta fjórðungi 2019 fjölgaði líka ítölskum ferðamönnum um 30 prósent og hótelnóttum þeirra um 23 prósent.
