Nýverið lögðu Samtök ferðaþjónustunnar fram tillögur sínar að viðspyrnu greinarinnar nú þegar Covid-19 heimsfaraldurinn er í rénum. Meðal þess sem forsvarsfólk ferðaþjónustunnar leggur til er að stofnaður verði sérstakur fjárfestingasjóður, með þátttöku lífeyrissjóða, sem hafi það að markmiði að bæta eiginfjárstöðu lífvænlegra fyrirtækja.
Túristi leitaði álits þriggja stórra lífeyrissjóða á hugmyndinni.
Í svari Gildis er bent á að lífeyrissjóðurinn sé nú þegar hluthafi í nokkrum framtaks- og nýsköpunarsjóðum sem hafa heimildir til fjárfestinga í fyrirtækjum í ferðaþjónustu.
„Sumir þessara sjóða eru nýlega stofnaðir og hafa því umtalsverða fjárfestingagetu. Við sjáum því í raun ekki tilefni til að stofnaður verði sérstakur sjóður með áherslu á fjárfestingar í ferðaþjónustu,“ segir í svari Gildis.
Þegar spurt er hvort lífeyrissjóðurinn sé opinn fyrir auknum fjárfestingu í ferðaþjónustu þá er svarið jákvætt. „Við skoðum öll áhugaverð tækifæri með opnum hug, hvort sem þau eru í ferðaþjónustu eða öðrum atvinnugreinum. Aðkoma Gildis að slíkum fjárfestingum er þó oft á tíðum í gegnum framtakssjóði sem Gildi er hluthafi í. Það er ekki nema fjárfestingartækifærin séu þeim mun stærri að við eigum beina aðkomu að fjárfestingu í þeim,“ segir í svari Gildis.
Segja má að LSR sé á sömu nótum því forsvarsfólk þess sjóðs vísar líka til nýrra innlendra framtakssjóða þegar kemur að fjárfestingum í ferðaþjónustufyrirtækjum.
„LSR mun taka þátt í nýjum innlendum framtakssjóðum frá Stefni, Kviku og VEX og er að skoða aðkomu að nýjum sjóði hjá Landsbréfum. Samanlögð fjárfestingargeta þessara sjóða verður rúmlega 50 milljarðar króna og þar munu án efa verða skoðaðir fjárfestingarkostir í ferðaþjónustu, enda mun það áfram verða einn af aðalatvinnuvegum þjóðarinnar. Hjá LSR hefur ekki sérstaklega verið skoðað að taka þátt í sérstökum fjárfestingarsjóði ferðaþjónustunnar og ekki hægt að segja til um mögulega aðkomu að slíkum sjóði núna.“
Hjá Lífeyrissjóði verzlunarmanna fengust þau svör, um mögulega þátttöku í sérstökum ferðaþjónustusjóði, að í hvert sinn sem óskað er eftir að sjóðurinn fjárfesti í nýjum verkefnum þá fari erindi ákveðna faglega leið.
Þar er einkum horft til mögulegrar arðsemi fjárfestingarinnar og öryggis hennar. Einnig er í vaxandi mæli horft til svonefndra UFS þátta, þ.e. umhverfis- og félagslegraþátta og stjórnarhátta.
Í svari Lífeyrissjóðs verzlunarmanna er jafnframt bent á að auk 2,3 prósent hlutar í Icelandair þá hafi sjóðurinn með óbeinu hætti fjárfest í fjölda ferðaþjónustufyrirtækja eða verkefna sem tengist greininni.