Áætlunarflug bandaríska flugfélagsins Delta hingað til lands frá New York hófst á ný í gær. Um átta af hverjum tíu sætum voru skipuð farþegum og hlutfallið hækkar í næstu ferðum.
Í Íslandsflugið frá JFK flugvelli í New York notast Delta við 168 sæta Boeing 757 þotur. Og samkvæmt upplýsingum frá flugfélaginu þá var sætanýtingin í ferðinni í gær 78 prósent. Í þotunni sem lenti á Keflavíkurflugvelli nú í morgunsárið var nýtingin lakari eða 62 prósent.
Aftur á móti verður farþegarýmið í þotu Delta sem kemur til Keflavíkurflugvallar á miðvikudaginn þéttsetið því 84 prósent sætanna um borð eru seld nú þegar. Hlutfallið í ferðinni þann 7. maí er nærri það sama eða 83 prósent.
Eins og staðan er núna þá munu að minnsta kosti 515 Bandaríkjamenn nýta sér þessar fjórar fyrstu ferðir Delta hingað til lands.
Aftur á móti má gera ráð fyrir að lausu sætin verði mörg í ferðunum frá Keflavíkurflugvelli og vestur um haf því ennþá eru landamæri Bandaríkjanna lokuð öðrum en íbúum landsins.