Flugáætlun Icelandair í næsta mánuði hefur tekið miklu breytingum að undanförnu og sérstaklega þegar kemur að flugi til Evrópu.
Þannig voru nærri níu hundruð brottfarir í júní, frá Keflavíkurflugvelli, í sölu á heimasíðu félagsins fyrir þremur vikum síðan. Nú hefur þeim verið fækkað niður í tæplega fjögur hundruð. Niðurskurðurinn nemur fimmtíu og sex prósentum sem er í takt við það sem Túristi hafði áður bent á að kynni að vera í uppsiglingu.
„Við erum að aðlaga áætlunina að eftirspurn og þeim ferðatakmörkunum sem eru í gildi. Þannig höfum við unnið þetta síðustu mánuði. Nú eru fleiri markaðir að opnast sem er jákvætt og eins og reynslan sýnir getur það gerst með stuttum fyrirvara. Við erum tilbúin að auka flugið um leið og það gerist,“ segir Ásdís Pétursdóttir, upplýsingafulltrúi Icelandair, spurð um skýringar á þessum breytingum á flugáætlun.
Samkvæmt athugun Túrista þá hefur ferðum Icelandair innan Evrópu verið fækkað meira eða um 62 prósent. Munar þar sérstaklega um niðurfellingu á flugi til Bretlands, Þýskalands, Danmerkur og Frakklands sem alla jafna vega þungt í áætlun Icelandair.
Samdrátturinn í flugi til Norður-Ameríku er minni eða um 44 prósent og stóran hluta af því má rekja til þess að áfram liggur flug til kanadískra áfangastaða niðri. Landamæri Kanada eru nefnilega ennþá öllum lokuð. Bandaríkin leyfa aftur á móti bólusettum þegnum sínum að fljúga úr landi en hleypa aftur á móti ekki erlendum ferðamönnum inn.
Í samanburði við júní árið 2019 þá er flugáætlun Icelandair í dag rétt um fjórðungur af því sem var fyrir tveimur árum síðan. Það er þó minni niðursveifla en hefur verið síðustu mánuði. Þannig minnkað framboð félagsins um 95 prósent í apríl í samanburði við sama mánuð árið 2019.