Viðskiptavinum Allianz í Bandaríkjunum stendur til boða trygging sem bætir þeim hugsanlegt tjón sem rekja má til rekstrarerfiðleika ferðaskrifstofa eða flugfélaga sem þeir hafa keypt ferðir af.
Tryggingafélagið birtir reglulega lista yfir þau fyrirtæki sem tryggingin nær til og er hann meðal annars notaður af ferðaskrifstofum vestanhafs til að meta áhættuna af því að versla við tiltekin fyrirtæki.
Icelandair hefur verið á lista yfir þá birgja sem Allianz ábyrgist („Covered Supplier List“) en datt út af honum um þarsíðustu mánaðamót.
Í kjölfarið óskaði Túristi eftir skýringu frá Allianz á þessari ákvörðun og í svari tryggingafélagsins segir að ekki sé hægt að veita upplýsingar um afhverju fyrirtæki er á listanum og afhverju ekki. Skýringin geti til að mynda verið sú að viðskomandi uppfylli ekki þau skilyrði sem sett eru eða að tryggingafélagið hafi ekki nægar upplýsingar um birginn.
Því er svo bætt við að ekki beri að túlka fjarveru af listanum sem athugasemd við fjárhagslegan styrk eða stöðu.
Það er reyndar ekki í takt við það svar sem Icelandair fékk frá Allianz eftir að Túristi leitaði viðbragða flugfélagsins á þessum breytingum. Þar segir að matið byggi á uppgjörum fyrir árið 2020 og þau sýni fram á taprekstur og neikvætt sjóðstreymi.
Tryggingafélagið vildi þó ekki veita ítarlegri upplýsingar um þetta mat en eins og liggur í augum uppi þá gekk rekstur ferðaþjónustufyrirtækja illa í nær öllum tilvikum í fyrra vegna kórónuveirukreppunnar.
Þess má jafnframt geta að íslensku ferðaskrifstofunnar Iceland Travel og Iceland Encounter eru báðar á lista Allianz yfir tryggingarhæfa birgja. Sú fyrrnefnda er einmitt í eigu Icelandair Group.
Túristi benti Allianz á þau tengsl en talsmaður tryggingafélagsins vildi ekki bæta neinu við fyrri svör sín. Í því samhengi ber að hafa í huga að ferðaskrifstofur eru vanalega með skyldutryggingar í gegnum opinbera aðila en það eru flugfélög ekki.
Þau evrópsku flugfélög sem eru núna á lista Allianz yfir tryggingarhæfa birgja eru: Easyjet, Ryanair, Lufthansa, Aer Lingus, British Airways og Iberia. Þau þrjú síðastnefndu tilheyra öll sama móðurfélaginu.