Flugfélögin Ryanair og Wizz Air birta mánaðarlega upplýsingar um hver mengunin er af flugrekstrinum. Þessu fordæmi stefna stjórnendur Play á að fylgja samkvæmt því sem fram kemur í fjárfestakynningu félagsins.
Þar segir að gert sé ráð fyrir að losun gróðurhúsalofttegunda muni nema 65 grömmum á hvern floginn sætiskílómetra á næsta ári. Það þýðir í raun að losunin nemur um 160 kílóum á hvern farþega sem flýgur héðan til Kaupmannahafnar með félaginu.
Til samanburðar er losunin að jafnaði 58 grömm á sætiskílómetra hjá Wizz Air sem stendur sig best allra evrópskra flugfélaga á þessu sviði. Meginskýringin á árangri félagsins er nýlegur flugfloti og mjög há sætanýting. Af þeim sökum hefur losunin hjá Wizz Air hækkað í heimsfaraldrinum því þoturnar eru ekki eins þéttsetnar og áður.
Hjá Icelandair nemur losunin aftur á móti 99 grömmum á sætiskílómetra samkvæmt útreikningum í fjárfestakynningu Play. Munurinn á Play og Icelandair verður þá um þriðjungur.
Það má hins vegar gera ráð fyrir að losunin hjá Icelandair muni minnka í nánustu framtíð því nú er félagið að taka í notkun sífellt fleiri MAX þotur. Þær eru nefnilega mun sparneyttari en gömlu Boeing 757 og 767 þoturnar.
Það má líka horft til þess að fraktflutingar Icelandair hafa neikvæð áhrif á losun félagsins. Það þarf nefnilega ófáa lítra af þotueldsneyti til að fljúga með tugi tonna af frakt. Og þegar því magni er svo deilt niður á farþega þá verður niðurstaðan mun verri en ef aðeins ferðatöskur væru farangursrýminu.
Í því samhengi má benda á að Wizz Air og Ryanair eru ekki umsvifamikil í vöruflutningum. Það vinnur þá með félögunum þegar losun á hvern farþega er reiknuð út. Hver áform Play eru í fraktflugi liggur ekki fyrir því á þennan hluta starfseminnar er ekkert minnst á í fyrrnefndri fjárfestakynningu.
Ef stjórnendur Play ákveða að fara skora Icelandair á hólm í fraktflugi þá má um leið gera ráð fyrir að losun gróðurhúsalofttegunda á hvern sætiskílómetra aukist umfram þau markmið sem félagið hefur sett sér.