Það var í ársbyrjun 2019 sem eitt af dótturfélögum Icelandair Group eignaðist 51 prósent hlut í flugfélaginu Cabo Verde Airlines ásamt nokkrum íslenskum fjárfestum. Þeirra á meðal var Björgólfur Jóhannsson, fyrrum forstjóri Icelandair, sem tók við sem stjórnarformaður Cabo Verde Airlines.
Flugfélagið var áður alfarið í eigu ríkissjóðs Grænhöfðaeyja og hið opinbera hélt eftir 39 prósent hlut í félaginu og starfsmenn þess fengu tíund.
Starfsemi Cabo Verde Airlines hefur alfarið legið niðri frá upphafi Covid-19 heimsfaraldursins en nú er félagið að hefja flug á ný eftir að hafa fengið fjárhagslega stuðning frá stjórnvöldum. Það hefur hins vegar legið fyrir að Icelandair Group mun ekki að setja meira fé í reksturinn.
Og segja má að forsætisráðherra Grænhöfðaeyja hafi sent íslenskum eigendum Cabo Verde Airlines kaldar kveðjur í sjónvarpsávarpi sínu á mánudag. Þar sagði hann ríkisstjórn eyjaklasans reiðubúna til að þjóðnýta Cabo Verde Airlines og bjarga þannig þrjú hundruð störfum.
„Íslendingarnir hafa ekki staðið við sinn hluta samkomulagsins,“ sagði forsætisráðherrann og vísaði til þess að Loftleiðir Icelandic, dótturfélag Icelandair Group, hefði ekki stutt við áframhaldandi rekstur Cabo Verde Airlines. Þetta kemur fram í frétt Le Figaro.
Túristi mun birta viðbröðg stjórnenda Cabo Verde Airlines og Icelandair Group við þessum yfirlýsingum forsætisráðherra Grænhöfðaeyja þegar þau berast.
