Í uppgjöri sínu við Andra Má Ingólfsson sumarið 2019 þá tók Arion banki yfir danska eignarhaldsfélagið Travelco Nordic. Því félagi tilheyrðu sjö norrænar ferðaskrifstofur, þar af tvær íslenskar.
Travelco Nordic varð gjaldþrota síðastliðið haust og þá var strax ljóst að danski ferðaábyrgðasjóðurinn, Rejsegarantifonden, yrði fyrir sínu þyngsta höggi.
Í nýrri ársskýrslu sjóðsins kemur fram að tjónið nemur 52,7 milljónum danskra króna eða rúmlega milljarði íslenskra króna. Sú upphæð er nærri tvöfalt hærri en sem nemur þeim ábyrgðum sem Travelco Nordic var með hjá sjóðnum.
Við þetta tjón Rejsegarantifonden bætast lán sem danska ríkið hafði veitt Travelco Nordic í gegnum sjóðinn vegna þess ástands sem Covid-19 olli í ferðaþjónustunni. Samtals nam lánsupphæðin 86 milljónum danskra króna eða 1,7 milljarði íslenskra króna.
Heildartjón ferðaábyrgðasjóðsins og danska ríkisins, af falli Travelco Nordic, er því rúmlega 2,7 milljarðar króna. Aldrei áður hefur sjóðurinn orðið fyrir eins miklu tapi af falli danskrar ferðaskrifstofu.
Líkt og Túristi fjallaði um í febrúar sl. þá fór stjórn danska ferðaábyrgðasjóðsins fram á rannsókn á samskiptum sjóðsins og Travelco Nordic. Það eina sem sett var út á í niðurstöðum þeirrar rannsóknar var lánveiting til ferðaskrifstofunnar í október í fyrra. Á þeim tíma var Travelco Nordic nefnilega komið í vanskil á öðru stóru láni frá sjóðnum.
Eins og gefur að skilja hafði Covid-19 mikil neikvæð áhrif á rekstur ferðaskristofanna sem tilheyrðu Travelco Nordic en Arion banki var nærri því að selja félagið fyrir heimsfaraldur.
Afskipti Arion banka af ferðaskrifstofurekstri lauk hins vegar ekki við gjaldþrot Travelco Nordic. Bankinn á í dag stóran hlut í Bravo Tours í Danmörku sem var stærsta ferðaskrifstofan innan Travelco Nordic.
Heimsferðir, sem jafnframt tilheyrðu danska móðurfélaginu, eru svo alfarið í eigu Arion banka en í lok síðasta árs var undirritað samkomulag um kaup Ferðaskrifstofu Íslands á Heimsferðum.
Þau viðskipti voru gerð með fyrirvara um samþykki samkeppnisyfirvalda. Ennþá liggur úrskurður um það mál ekki fyrir.