Það er ekki aðeins Icelandair sem hefur tekið úr sölu stóran hluta af brottförum sínum frá Keflavíkurflugvelli nú í júní með stuttum fyrirvara.
Dagskrár erlendu flugfélaganna hafa nefnilega líka dregist verulega saman samkvæmt talningum Túrista. Þann 6. maí voru félögin með nærri fjögur hundruð ferðir á boðstólum til Íslands í júní samkvæmt talningu Túrista. Í dag. 1. júní, er fjöldinn kominn niður í 289 ferðir. Samdrátturinn nemur um fjórðungi.
Þessar sviptingar eru dæmi um hversu stjórnendur flugfélaga eiga erfitt með að lesa í markaðinn. Ein af skýringunum á því er sú að nú bókar fólk með mun styttri fyrirvara en áður líkt og fram kom í tilkynningu frá SAS í síðustu viku. Vegna ástandsins ætlar þetta stærsta flugfélag Norðurlanda að byrja að draga á lánalínur frá sænska og danska ríkinu.
Eins og staðan er núna þá verður bandaríska flugfélagið Delta það umsvifamesta á Keflavíkurflugvelli í júní ef Icelandair er frátalið. Þar á eftir koma Wizz Air, Lufthansa og EasyJet.
Aftur á móti hafa Norwegian og S7 tekið úr sölu allar sínar ferðir til Íslands í júní og Eurowings, Transavia og Czech Airlines hafa fækkað sínum ferðum umtalsvert.
Í heildina tekið munu erlend flugfélög þó standa fyrir um tíu ferðum á dag að jafnaði til Keflavíkurflugvallar sem er mun meira framboð en verið hefur síðustu misseri.