Íslandshótel eru stærsta hótelfyrirtæki landsins og í dag eru átta af ellefu hótelum þess á landsbyggðinni opin. Í Reykjavík er aðeins eitt opið en það er hið fjögurra stjörnu Grand Hótel.
Stefnt er að því að opna fleiri í höfuðborginni á næstum vikum og mánuðum að sögn Davíð Torfa Ólafssonar, framkvæmdastjóra Íslandshótela.
Hann segir ágætis upptakt vera í bókunum en bókunartíminn sé mjög stuttur. Nú í sumarbyrjun hafa það helst verið bandarískir ferðamenn sem hafa komið til landsins en Davíð Torfi segir Evrópu vera að koma hægt og rólega inn. Aftur á móti séu engin batamerki varðandi eftirspurn frá Austurlöndum fjær.
„Japan er komið mjög stutt í bólusetningum og Kína lokað. Við gerum því ekki ráð fyrir Asíu fyrr en á næsta ári,“ segir Davíð Torfi.
Þess má geta að í dag eru sóttvarnarhótel rekin í húsnæði á vegum Íslandshótela á höfuðborgarsvæðinu. Ekki liggur fyrir hvenær sá rekstur verður lagður niður.