Þeir ferðamenn sem dvöldu á landinu í maí eyddu að jafnaði mun meiru en venja er. Erlend kortavelta nam um 5,6 milljörðum króna í maí samkvæmt úttekt Rannsóknarseturs verslunarinnar.
Þegar erlendu kortanotkuninni í maí er skipt niður í flokka þá kemur í ljós að hlutfallslega fór mun minna af kortaveltunnu í maí í kaup á gistingu. Sá flokkur stendur vanalega undir fjórðungi af veltunni en núna var hlutfallið rétt fjórtán prósent.
Gistináttatölur Hagstofunnar fyrir maí liggja ekki fyrir og þær munu varpa betra ljósi á þróun í fjölda gistinátta á hvern og einn ferðamann. Skýringin á minni útgjöldum í gistingu gæti þó frekar legið í lægra verði á hótelum í stað færri gistinótta.
Kaupa meira af afþreyingu
Veitingastaðir greiðslukort voru notuð þeir hlutfallslega minna af veitingum en áður en mun meiri af því sem flokkast sem „önnur ferðaþjónusta“ í úttekt Rannsóknarsetur verslunarinnar. Kaup á ferðatengdri afþreyingu heyrir undir þennan flokk.
Útgjöld í bílaleigubíla voru hærri en áður sem er vísbending um að færri hafa nýtt sér hópaferðir sem er í takt við það sem spáð var að fólk myndi vilja ferðast meira á eigin vegum nú á tímaum Covid-19.
Þeir ferðamenn sem voru á Íslandi í maí eyddu líka meiru í verslun en alla jafna. Mest í dagvöruverslun sem fyrr en minna í minjagripabúðum eins og sjá má á töflunni hér fyrir neðan.
Veruleg aukning í meðaleyðslu
Það flugu rétt um 14.400 erlendir ferðamenn frá Íslandi maí. Ef allri kortaveltunni er deilt á þennan fjölda þá kemur í ljós að hver og einn þeirra eyddi að jafnaði 388 þúsund kr. Til samanburðar var kortanotkunin 146 þúsund á hvern ferðamann í maí 2019. Munurinn er því gríðarlegur og vert að fylgjast með hvort þessi þróun haldi áfram nú í sumar.
Skýringin á þessari þróun gæti að einhverju leyti legið í lengri dvalartíma og auknu vægi bandaríska ferðamanna. Þeir eyða vanalega nokkru meiru en flestar aðrar þjóðir.
Aftur á móti skekkir notkun Íslendinga á Apple pay eða erlendum greiðsluþjónustum ekki tölurnar samkvæmt upplýsingum frá Rannsóknarsetri verslunarinnar.
„Gögn okkar um kortaveltu innihalda allar færslur sem fara í gegnum posa og vefverslanir fyrirtækja sem versla við íslenska færsluhirða að undanskildum Pei og Síminn Pay,“ segir jafnframt í svarinu.
Hafa ber í huga að greiðslur Íslendinga með erlendum greiðslukortum teljast skiljanlega sem erlend kortavelta. Þetta á t.d. við um Íslendinga búsetta út í heimi sem eru á ferð á Íslandi. Þeir flokkast hins vegar ekki sem ferðamenn þegar þeir fara frá landinu.
