Stefnt er að því að Straumhvarf ehf., rekstrarfélag Arctic Adventures, fari úr greiðsluskjóli á þriðjudaginn í næstu viku. Þá verður ár liðið frá því að félagið fékk heimild til að nýta sér úrræði um tímabundið greiðsluskjól.
Skuldir félagsins nema í dag rétt um 1,1 milljarði króna og þar af eru skuldir við viðskiptavini 573 milljónir króna. Ætlunin er að endurgreiða að fullu allar alferðir og er sú endurgreiðsla fjármögnuð með láni frá Ferðaábyrgðarsjóði upp á 273 milljónir króna.
Aðrar ferðir verða endurgreiddar skv. skilmálum en öllum viðskiptavinum verða boðnar hagstæðar inneignir í stað endurgreiðslu. Þetta kemur fram í bréfi sem sent var lánadrottnum Straumhvarfa þann 5. júní.
Þar er almennum kröfuhöfum gefnir tveir kostir. Annars vegar að fá skuld sína að fullu greidda en í fjórum jafnstórum afborgunum. Sú síðasta dagsett þann 1. apríl á næsta ári. Kröfuhafar fá einnig val um að fá áttatíu prósent af kröfu sinni og fer uppgjörið þá fram nú um mánaðamótin.
Hluti af fjárhagslegri endurskipulagningu Straumhvarfs byggir á 200 milljón króna láni frá Landsbanka Íslands.
Arctic Adventures er eitt stærsta ferðaþjónustufyrirtæki landsins og sérhæfir sig í afþreyingu fyrir ferðafólk. Undir lok árs 2019 var gengið frá samruna fyrirtækisins við Into the Glacier og það ár nam hagnaður Straumhvarfs 482 milljónum króna.