Nú í ársbyrjun var stefnt að opnun Marriott Edition hótelsins við Hörpu í vor. Ekki varð af því og í staðinn var horft til þess að taka þetta fyrsta fimm stjörnu hótel höfuðborgarinnar í notkun nú í september eða október.
Það er þó ekki víst að það gangi eftir því samkvæmt svörum frá hótelkeðjunni, við fyrirspurn Túrista, er núna ætlunin að opna hótelið í lok árs. Ekki fást nákvæmari upplýsingar um tímasetningar.
Eins og flestum er kunnugt þá hafa framkvæmdir við hótelbygginguna við Hörpu hafa tekið mun lengri tíma en upphaflega var gert ráð fyrir. Þannig var lengi ætlunin að taka á móti fyrstu gestunum árið 2018. Framkvæmdin hefur líka farið fram úr kostnaðaráætlunum.
Sem fyrr segir verður Marriott Edition hótel fyrsta fimm stjörnu hótelið í Reykjavík og jafnframt eitt stærsta hótel höfuðborgarinnar. Þar verða nefnilega 253 herbergi.