Fyrir heimsfaraldur var Norwegian það flugfélag sem flutti flesta farþega milli Íslands og Spánar og eins hélt félagið úti áætlunarflugi hingað frá Ósló. Áður hafði félagið líka spreytt sig á Íslandsflugi frá Róm, London, Stokkhólmi og Bergen.
Allt áætlunarflug norska félagsins til Keflavíkurflugvallar hefur hins vegar legið niðri síðan í lok ágúst í fyrra. Á fimmtudaginn tekur flugfélagið þó upp þráðinn á ný með ferðum hingað frá Gardermoen í Ósló. Í framhaldinu er gert ráð fyrir tveimur ferðum í viku, á fimmtudögum og sunnudögum, í allan vetur ef frá eru taldar fyrstu vikurnar í desember.
Norwegian hefur aftur á móti lokað starfsstöðvum sínum fyrir utan Skandinavíu og mun því ekki fljúga til Íslands frá Spáni í vetur.
Og reyndar kemur Norwegian út úr Covid-19 faraldrinum sem gjörbreytt flugfélag. Þannig hefur félagið lagt niður allt áætlunarflug til Norður-Ameríku en á tímabili var félagið umsvifamesta evrópska flugfélagið á JFK flugvelli í New York. Félagið var líka eitt það stærsta á Gatwick flugvelli í London.