Nú í sumarbyrjun sögðust níu af hverjum tíu Íslendingum ætla að ferðast innanlands í sumar og stór hluti ætlaði að láta veðrið ráða ferðinni.
Sumarblíðan hefur þó lítið látið á sér kræla og stærstu ferðaskrifstofur landsins finna fyrir auknum áhuga landsmanna á utanlandsferðum nú í sumar.
„Við höfum fundið fyrir meiri og meiri þunga í bókunum eftir því sem bólusetningum miðar áfram og eigum til að mynda ekki til eitt einasta sæti út júní. Fyrripartur júlí er orðin þéttbókaður og mjög fá sæti eftir í sólina. Íslendingar eru bæði orðnir mjög ferðaþyrstir og svo hefur sumarið á Íslandi verið hrein hörmung,“ segir Þráinn Vigfússon, framkvæmdastjóri Vita, spurður um eftirspurn eftir utanlandsferðum nú í sumar.
Hann segir fólk aðallega vera að tryggja sér sæti í sól þegar sér fyrir endann á bólusetningum í fjölskyldunni. Vinsælustu áfangastaðirnir séu því Alicante og Tenerife og bendir Þráinn á að sá fyrrnefndi sé nú grænt svæði alveg eins og Ísland.
Þórunn Reynisdóttir, forstjóri Ferðaskrifstofu Íslands, segir góðan stíganda vera þar á bæ og fólk sé að bóka með stuttum fyrirvara. Hún segist gera ráð fyrir ennþá betri gangi eftir þessa viku enda margir sem verði bólusettir næstu daga.
Eins og gefur að skilja þá er framboð á sólarlandaferðum núna mun minna en það var fyrir heimsfaraldur. Úrvalið hjá ferðaskrifstofunum eykst þó næstu vikur. Næði verða brottfarirnir til Spánar tíðari og eins bætast við ferðir til Krítar í byrjun júlí hjá Heimsferðum, Úrval-Útsýn og Vita.