Play varð fullgilt flugfélag þann 15. maí þegar Samgöngustofa úthlutaði félaginu flugrekstrarleyfi en stofnendur Play, þá WAB, lögðu inn umsókn um leyfið fyrir tveimur árum síðan.
Þó flugrekstrarleyfið hafi ekki veruð í höfn nú í ársbyrjun þá var það metið á nærri þrjár milljónir dollara í bókum Play þann 1. janúar. Sú upphæð jafngildir 365 milljónum íslenskra króna. Matið hækkaði svo um 92 milljónir (745 þúsund dollara) fram til 30. apríl sl.
Þetta kemur fram í nýrri skráningarlýsingu sem Play hefur birt í tengslum við hlutafjárútboð félagsins sem hefst núna á fimmtudaginn. Sama dag og Play fer jómfrúarferð sína til Stansted flugvallar í London.
Líkt og Fréttablaðið greindi frá í morgun þá vill forsvarsfólk endurreisnar Wow Air meina að þau hafi ekki fengið þau flugrekstrargöng sem þau töldu sig hafa keypt út úr þrotabúi Wow Air. Hafa þau því farið fram á að skýrsla verði tekin af stofnendum Play, áður WAB, til að leita sönnunar um hvar flugrekstrarhandbækur félagsins enduðu.
Fréttablaðið greinir jafnframt frá því í dag að Sveinn Andri Sveinsson, skiptastjóri Wow Air, hafi nú í byrjun júní sent Samgöngustofu tölvupóst þar sem hann segir að sér hafi borist upplýsingar um að stofnendur Play hafi hagnýtt sér afritaðar handbækur WOW.