Flugfélagið Virgin Australia hefur ekki skilað hagnaði í mörg ár og fór félagið í greiðslustöðvun stuttu eftir að Covid-19 faraldurinn hófst í fyrra. Í kjölfarið var leitað tilboða í reksturinn. Meðal þeirra sem sýndu félaginu áhuga voru Indigo Partners sem lengi íhuguðu kaup á Wow Air.
Það var hins vegar fjárfestingastjóðurinn Bain Capital sem bauð best en í gærkvöld var tilkynnt að sá sjóður hefði gert samning um kaup á nýju hlutafé í Icelandair Group fyrir 8,1 milljarð króna.
Ef kaupin verða samþykkt af núverandi hluthöfum þá eignast Bain Capital 16,6 prósent hlut í Icelandair Group og fær jafnframt sæti stjórnarformanns. Úlfar Steindórsson, nýverandi stjórnarformaður, mun nefnilega láta af störfum samkvæmt því sem fram kemur í fréttatilkynningu. Frekari breytingar í efstu lögum Icelandair eru ekki boðaðar í tilkynningunni.
Og það voru heldur engar breytingar í framkvæmdastjórn Virgin Australia í deiglunni þegar Bain Capital tók við lyklavöldunum þar. Forstjóri félagsins, Paul Scurrah, hafði til að mynda lýst yfir opinberum stuðningi sínum við tilboð Bain Capital. Bæði þegar sannfæra átti starfsmenn um tilboð sjóðsins og líka kröfuhafa.
Bain Capital gerði mikið úr þessum stuðning forstjórans enda var sá vinsæll í röðum starfsfólks líkt og rakið er í grein Financial Review.
Sex vikum eftir að Bain eignaðist Virgin þá var hins vegar tilkynnt að Scurrah myndi láta hætta sem forstjóri. Við starfi hans tók Jayne Hrdlicka en sú hafði meðal annars unnið fyrir Bain Capital og var ráðgjafi sjóðsins í tengslum við kaupin á Virgin.
Og Hrdlicka er ekki eini stjórnandi ástralska flugfélagsins sem verið hefur launþegi hjá Bain Capital. Nýr framkvæmdastjóri sölu- og markaðsmála Virgin Australia kemur nefnilega beint frá Bain Capital.
Þess ber að geta að Bain Capital er eini eigandi Virgin Australia.
