Meirihluti lána Íslandsbanka til ferðaþjónustunnar er til fyrirtækja sem eru aðeins rekstrarhæf ef fjöldi túrista í ár verður nærri tvöfalt hærri en spár Isavia gera ráð fyrir.
Í síðasta ársuppgjöri bankans voru lán til ferðaþjónustufyrirtækja, þar með talið flugfélaga, flokkuð eftir þolgæði viðskiptavina. Og af þeim 94 milljörðum króna sem bankinn átti útistandandi hjá ferðaþjónustufyrirtækjum, í lok síðasta árs, þá var 61 milljarður kr. hjá fyrirtækjum sem aðeins eru rekstrarhæf ef spá bankans um sjö hundruð þúsund ferðamenn í ár gengur eftir.
Stjórnendur Isavia gera hins vegar aðeins ráð fyrir 400 þúsund ferðamönnum í ár samkvæmt nýrri spá en síðustu ár hefur Isavia verið mun nær því að segja rétt til um um fjölda túrista en greiningardeildir bankanna. Starfsmenn Isavia sitja líka einir að upplýsingum um áform flugfélaga og skiptingu farþega.
Nýtt mat á lánasafninu væntanlegt
„Íslandsbanki mun eftir sem áður standa með lífvænlegum viðskiptavinum sínum í ferðaþjónustu,“ segir Björn Berg Gunnarsson, deildarstjóri hjá Íslandsbanka, spurður hvort gripið hafi verið til aðgerða til að styðja enn frekar við fyrirtæki sem ekki verða rekstrarhæf ef spá Isavia gengur eftir.
„Við erum bjartsýn á framtíð greinarinnar og heilt yfir tilbúin að styðja við hana þó svo að aukning á fjölda ferðamanna verði minni til að byrja með heldur en spár gera ráð fyrir,“ bætir Björn Berg við.
Hann segir að uppfært mat á lánasafni Íslandsbanka verði birt með uppgjöri annars ársfjórðungs.