Þegar vika var liðin frá því að Play hóf að selja farmiða, nánar tiltekið þann 26. maí, þá kostaði að jafnaði 13.494 krónur að fljúga með félaginu til Parísar í júlí og ágúst og 24.183 kr. til Tenerife.
Sá sem bókar far í dag borgar um tíund meira ef ferðinni er heitið til höfuðborgar Frakklands þessa tvo mánuði. Farmiðinn til Tenerife hefur hækkað um níu prósent.
Aftur á móti hefur fargjaldið til London lækkað um sjö prósent og um tvö prósent ef ferðinni er heitið til Barcelona eins og sjá má á töflunni hér fyrir neðan.
Í eðlilegu árferði hefðu fargjöldin yfir hásumarið hækkað meira en niðurstöður verðkannana Túrista sýna. Eftirspurn eftir ferðalögum er hins vegar takmarkaði í dag en áður og fólk bókar með stuttum fyrirvara. Það hefur líka áhrif á verðlagninguna hjá Play að félagið er að koma inn á markaðinn með mikið magn af sætum stuttu áður sumarið hefst.
Á sama tíma má gera ráð fyrir að stjórnendur Play hefðu ekki hikað við að hækka fargjöldin töluvert ef lausu sætin um borð í þotunum væru af skornum skammti. Það er sennilega ekki staðan og því stendur farmiðaverðið nánast í stað.
Í könnun Túrista er miðað við fargjöld frá Íslandi ef heimferð er bókuð á sama tíma. En eins og áður hefur verið fjallað um þá er verðlagning Play á stökum farmiðum ekki í takt við það sem gerist og gengur hjá evrópskum lágfargjaldaflugfélögum.
