Ferðalög á milli landa að aukast á nýjan leik og það endurspeglast í farþegatölum stærstu flugfélaga Norðurlanda fyrir nýliðinn maí.
Framboðið jókst umtalsvert og mest hjá Icelandair þar sem það ríflega sjöfaldaðist frá því í maí í fyrra. Skýringin á því er að hluta til sú að félagið nýtir nú í auknu mæli breiðþotur í áætlunarflug sitt til að auka afkastagetuna í fraktflutningum. Af þeim sökum eykst sætaframboðið meira en ástæða er til og sætanýtingin verður verri.
Framboðið hjá SAS og Finnair jókst einnig umtalsvert í maí en aftur á móti dróst það saman hjá Norwegian. Ástæðan fyrir þessari neikvæðu þróun er einfaldlega sú að starfsemi norska félagsins takmarkast í dag við flug frá skandinavískum flugvöllum og mest eru umsvifin í innanlandsflugi í Noregi.
Innanlandsflug vegur líka þyngra í rekstri Icelandair í dag og nú birtir félagið í fyrsta sinn farþegatölur sem sýna heildarfjölda farþega í bæði millilanda- og innanlandsflugi. Einnig er reiknuð út sameiginleg sætanýting.
Þetta verður að teljast framför í upplýsingagjöf félagsins því erlend flugfélög taka innanlandsflug jafnan með í reikninginn hjá sér. Af þeim sökum mun Túristi hér eftir notast við heildarumsvif Icelandair í samanburði sínum á þróun mála hjá flugfélaginu í samanburði við önnur flugfélög.
