Bólusettir Bandaríkjamenn hafa komið íslenskri ferðaþjónustu í gang á ný og nú stendur bandaríska flugfélagið Delta fyrir þremur ferðum á degi hverjum til Keflavíkurflugvallar. Icelandair hefur á sama tíma aukið flug sitt vestur um haf og í lok vikunnar hefst áætlunarflug United Airlines til Íslands.
Það þarf því ekki að koma á óvart að það eru helst notendur Google í Bandaríkjunum sem leita að Íslandsflugi eða gistingu hér á landi. Í öðru sæti eru Bretar og Þjóðverjar í því þriðja.
Pólverjar eru svo í fjórða sæti þegar kemur að fjölda leita eftir flugi til Íslands. Pólskir netverjar komast hins vegar ekki á topp 10 yfir þá sem helst leita að gistingu hér á landi. Þetta er í takt við það sem opinberar tölur hér á landi hafa endurtekið sýnt. Pólskir hótelgestir hér á landi eru ekki ýkja stór hópur þó fjöldi pólskra farþega á Keflavíkurflugvelli er fjölmennur.
Það vekur svo athygli að Kanadabúar eru ofarlega á báðum listum en ennþá komast þeir ekki úr landi og óljóst er hvenær slakað verður á sóttvarnaraðgerðum við kanadísk landamæri.
Einnig er vert að benda á að Danir eru meðal þeirra þjóða sem nú helst leita að gistingu á Íslandi. Í júní og júlí í fyrra voru Danir einmitt fjölmennastir í hópi ferðamanna hér á landi.