Forstjóri Icelandair væntir þess að þrjátíu þúsund erlendir ferðamenn fljúgi með félaginu til Íslands í þessum mánuði.
Það jafngildir því að um áttatíu túristar verði í hverri þotu Icelandair sem lendir á Keflavíkurflugvelli í júní.
Flugáætlanir erlendra flugfélaga gera ráð fyrir tæplega þrjú hundruð áætlunarferðum til Íslands í þessum mánuði og framboðið verður því á bilinu 48 til 52 þúsund sæti.
Ef nýtingin verður um fimmtíu prósent og stærsti hluti farþeganna útlendingar þá má reikna með að erlendu flugfélögin komi með til landsins að lágmarki tuttugu þúsund túrista í júní.
Þar munar mestu um áætlunarflug Delta og United frá Bandaríkjunum því eftirspurn eftir Íslandsflugi þar í landi er ennþá nokkru meiri en frá Evrópu. Samkvæmt upplýsingum frá United þá er sætanýtingin í ferðum félagsins til Íslands í takt við væntingar.
Ekki fást þó skýrari svör um gang mála en forstjóri United hefur þó áður látið hafa það eftir sér að eftirspurn eftir ferðum félagsins til Íslands, Grikklands og Króatíu sé mjög góð.
Hafa ber í huga að þó erlendu flugfélögin komi með um 20 þúsund ferðamenn til Íslands í júní og Icelandair 30 þúsund þá er ekki þar með sagt að talning Ferðamálastofu fyrir júní sýni 50 þúsund túrista.
Ferðamenn eru nefnilega taldir á leið úr landi og því mun hluti þeirra sem lenda á Keflavíkurflugvelli í júní verða taldir við brottför í júlí.
Þeir sem komu í lok maí eru á sama hátt taldir sem ferðamenn í júní en sá hópur var vafalítið fámennari en farþegarnir sem verður í vélunum sem fljúga til landsins í lok mánaðar.
Það komu um 6 þúsund erlendir ferðamenn til Íslands í júní í fyrra. Þeir voru 194 þúsund í júní árið 2019 og rúmlega helmingur flaug til landsins með Icelandair.