Hið 106 herbergja Exeter hótel við Tryggvagötu í Reykjavík var hluti af Keahótelunum þangað til síðastliðið haust þegar eigandi húseignarinnar tók við rekstrinum.
Hótelið hefur hins vegar verið lokað frá því að heimsfaraldurinn braust út í fyrra en verður opnað á ný þann 1. ágúst samkvæmt upplýsingum frá fasteignafélaginu Festi. En það félag á meirihluta í Tryggvagötu ehf. sem er eigandi hótelbyggingarinnar þar sem Exeter er til húsa.
Hótelstjóri verður sem fyrr Gylfi Freyr Guðmundsson en hann gegndi líka stöðunni þegar Exeter var hluti af Keahótelunum.