Fyrir tveimur árum síðan keypti malasíska fyrirtækjasamsteypan Berjaya 75 prósent hlut Icelandair Group í Icelandair hótelunum. Í febrúar sl. var svo gengið frá kaupsamningi á eftirstandandi fjórðungs hlut Icelandair Group í hótelkeðjunni.
Áfram sat þó Eva Sóley Guðbjörnsdóttir, þáverandi framkvæmdastjóri fjármálasviðs Icelandair Group, í stjórn Icelandair hótelanna. Ástæðan var sú að kaupsamningur Berjaya var gerður með fyrirvara um að seljandinn myndi uppfylla ákveðna skilmála samningsins.
Ennþá er Eva Sóley skráð sem stjórnarmaður í Icelandair hótelunum á vef Skattsins. Hún er þó ekki lengur með sæti í stjórninni samkvæmt svari frá Icelandair Group enda er gert ráð fyrir að viðskiptin við Berjaya fari endanlega í gegn á næstunni að öllum skilyrðum uppfylltum.
Þar með eru tengsl Icelandair Group við hótelkeðjuna senn á enda og segir Tryggvi Þór Herbertsson, stjórnarformaður Icelandair hótelanna, að hann geri ráð fyrir að stjórnarmönnum verði nú fækkað úr fimm í í þrjá.
Líkt og fram kom í nýlegu viðtali Túrista við Hildi Ómarsdóttur, framkvæmdastjóra hjá Icelandair hótelanna, þá stendur yfir vinna við að finna fyrirtækinu nýtt nafn. Það verður því ekki mikið lengur kennt við flugfélagið.