Gistinætur útlendinga hér á landi í maí voru nærri 74 þúsund talsins en til samanburðar voru þær 500 þúsund í sama mánuði árið 2019.
Þá flugu 126 þúsund erlendir farþegar frá Keflavíkurflugvelli og gistinæturnar nákvæmlega fjórar á hvern og einn. Í maí í ár voru næturnar 5,1 að meðaltali því rúmlega fjórtán þúsund erlendir farþegar fóru í gegnum talningu Ferðamálastofu við vopnaleitina í Leifsstöð.
Eins og sjá má á grafinu hér fyrir neðan þá styttist dvalartími ferðamanna verulega árið 2017. Þá um vorið benti Túristi á ofmat á fjölda ferðamanna hér á landi sem rekja mætti til þess að hluti skiptifarþega væru taldir sem ferðamenn. Þar með væri gistinóttunum deilt niður á of stóran hóp.
Í kjölfarið framkvæmdu Isavia og Ferðamálastofa sérstakar talningar á meðal farþega á Keflavíkurflugvelli sem staðfestu það sem Túristi hafði bent á. Fjöldi ferðamanna reyndist ofmetinn um tugi þúsunda á mánuði og dvalartíminn var því lengri en tölurnar segja til um.
Með gjaldþroti Wow Air í mars árið 2019 þá dró líka verulega úr framboði á ódýrum flugmiðum til og frá Keflavíkurflugvelli og þar með hefur svokölluð sjálftengifarþegum fækkað.
Um leið hefur skekkjan í ferðamannatalningunni minnkað og nú í maí hefur hún sennilega verið sáralítil því Bandaríkin og Kanada eru ennþá lokuð fyrir ferðamönnum. Það eru því ekki margir sem nýta Keflavíkurflugvöll sem skiptistöð á leið sinni yfir Norður-Atlantshafið.
Aftur á móti verður að hafa í huga að útlendingar búsettir á Íslandi eru taldir sem erlendir farþegar á Keflavíkurflugvelli en eins og Túristi hefur áður bent á þá eru Pólverjar vanalega fjölmargir meðal farþega í Leifsstöð en gistinætur pólskra ferðamanna á íslenskum hótelum eru fáar.