Icelandair hefur undirritað viljayfirlýsingu við sænska flugvélaframleiðandann Heart Aerospace um frekara samstarf um þróun farþegaflugvéla sem ganga fyrir rafmagni.
Flugvélarnar sem Heart Aerospace er með á teikniborðinu eru 19 sæta og eiga að komast 400 kílómetra. Til samanburðar er flugleiðin milli Reykjavíkur og Akureyrar um 250 kílómetra löng.
Í dag notar Icelandair mun stærri flugvélar í innanlandsflugið. Annars vegar Bombardier Q-400 flugvélar sem taka 72 farþega og hins vegar Bombardier Q-200 með sæti fyrir 37 manns.
Það komast því nærri fjórum sinnum fleiri í einni ferð með Q-400 flugvélunum en í rafknúnu vélunum sem Icelandair hefur augastað á. Félagið þarf því að fjölga brottförum umtalsvert eigi framboðið í innanlandsfluginu ekki að snarminnka með rafvæðingunni.
Í svari frá Icelandair, við fyrirspurn Túrista, segir þó að of snemmt sé að segja til um nákvæmlega hvernig tíðni flugferða myndi þróast.
„Við erum í raun að hefja þessa vegferð núna, vega og meta þessa kosti, hvernig hægt væri að útfæra þessar lausnir og hvaða þýðingu það hefði,“ segir jafnframt í svarinu.
Auk þess að skoða rafknúnar flugvélar þá halda stjórnendur Icelandair einnig þeim möguleika opnum að nota áfram gömlu Bombardier vélarnar en breyta þeim í vetnisknúnar flugvélar.
