Útlendingar keyptu rúmlega 2,8 milljónir gistinátta á norrænum hótelum í maí 2019. Í nýliðnum maí voru þær skiljanlega mun færri eða rétt um 442 þúsund talsins.
Þar af voru gistinætur útlendinga, á íslenskum hótelum, um 38 þúsund. Vægi Íslands á norræna markaðnum var því níu prósent sem er einu prósentustigi undir því sem var í maí 2019 eins og sjá má á töflunni hér fyrir neðan. Hún byggir á tölum frá hagstofum Norðurlandanna fimm.
Skýringin á lægri hlutdeild Íslands liggur í raun í hversu margar gistinætur útlendinga voru í Svíþjóð í maí sl. En sænsk landamæri hafa verið opnari en margra annarra landa nú í heimsfaraldrinum og það kann að skýra fjölda erlendra gistinátta á sænskum hótelum nú í maí.
Fjórar af hverjum tíu gistinóttum útlendinga í Svíþjóð skrifast þannig á gesti með ríkisfang utan Evrópu. Í því samhengi ber að hafa í huga að útlendingar, búsettir í hverju landi fyrir sig, eru vanalega flokkaðir samkvæmt þjóðerni en ekki heimilisfangi.