Júní í fyrra var mjög kaflaskiptur mánuður á Keflavíkurflugvelli. Það var nefnilega fyrst um miðjan mánuðinn sem slakað á sóttvarnaraðgerðum við íslensku landamærin. Í beinu framhaldi jókst flugumferðin umtalsvert frá því sem verið hafði vikurnar á undan.
Nú í vor og byrjun sumars hefur hins vegar verið góður stígandi í fjölda flugferða til og frá landinu í nánast hverri viku. Og sú þróun endurspeglast í farþegatölum Icelandair. Framboðið var þannig fimmfalt meira en í júní í fyrra og farþegahópurinn þrefaldaðist að stærð.
Þetta er meiri aukning en varð hjá hinum norrænu millilandaflugfélögunum eins og sjá má á töflunni hér fyrir neðan.
Í samanburði við hin félögin þá var sætanýtingin næst best hjá Icelandair.
Þess ber að geta að í þessum samanburði er horft til bæði millilanda- og innanlandsflugs hjá öllum fjórum flugfélögunum. Vægi innanlandsflugs er þó minnst hjá Icelandair.
