Um fjórði hver útlendingur sem heimsækir Ísland yfir vetrarmánuðina er með breskt vegabréf og eru Bretar því fjölmennasti í hópi ferðamanna hér á landi yfir háveturinn.
Og þegar kemur að framboði á flugi milli Íslands og Bretlands, utan háannatíma, þá hefur easyJet verið stórtækast. Félagið hefur til að mynda verið eitt um ferðirnar hingað frá Edinborg.
En líkt og Túristi greindi frá í morgun verða umsvifin á þeirri leið töluvert minni í vetur en fyrir Covid-19. Aðeins er gert ráð fyrir tveimur ferðum í viku eða allt að þrefalt færri en áður var.
Spurður um skýringu á þessum niðurskurði þá segir talsmaður easyJet einfaldlega að tíðni ferða ráðist af eftirspurn.
Færri ferðir frá öðrum flugvöllum líka
Það er þó ekki aðeins í flugi milli höfuðborgar Skotlands og Íslands sem easyJet sér fram á færri ferðir til Keflavíkurflugvallar. Í heildina tekið dregst Íslandsflug félagsins nefnilega saman um nærri fimmtung í vetur samkvæmt talningum Túrista. Flestar verða ferðirnar sem fyrr frá Luton flugvelli við Lundúnir.
Þetta er ekki í fyrsta sinn sem easyJet dregur úr umsvifum sínum hér á landi. Á tímabili flugu þotur félagsins nefnilega hingað frá sjö breskum flugvöllum en nú eru ekki lengur í boði ferðir frá Belfast og Stansted flugvelli í London. EasyJet lagði líka niður allt flug sitt til Íslands frá Genf og Basel í Sviss.