Viðskipti með hlutabréf Play hófust á First North markaðnum í Kauphöllinni í morgun og hækkuðu bréfin strax um allt að fjörtíu af hundraði. Með þessari miklu hækkun þá er virði Play nærri 18 milljarðar króna en áttföld eftirspurn var í hlutafjárútboði félagsins í síðasta mánuði.
Annað nýtt flugfélag, sem fór strax á hlutabréfamarkað, er norska lággjaldaflugfélagið Flyr. Það félag fór sína fyrstu áætlunarferð nú fyrr í sumar líkt og Play gerði.
Viðskipti með bréf Flyr hófust hins vegar nokkru áður eða þann 1. mars sl. Fyrsta viðskiptadaginn í norsku kauphöllinni rauk gengið upp um fimmtung og hækkaði aftur daginn eftir. Síðan þá hefur það lækkað um nærri þrjátíu prósent og markaðsvirði félagsins er í dag um 11 milljarðar króna.
Í flota Flyr eru ennþá aðeins tvær flugvélar líkt og hjá Play. Þriðja vélin bætist við hjá íslenska félaginu síðar í júlí sína og floti Flyr mun einnig stækka nú í sumar.
Sá mun samanstanda af eldri gerðum af Boeing 737 þotum en umsvif norska félagsins eru mest í innanlandsflugi í Noregi. Einnig býður félagið upp á flug til nokkurra evrópskra borga.