Heimasíður sem sérhæfa sig í að leita að flugmiðum rukka flugfélög um þóknanir fyrir að beina til þeirra viðskiptum. Ein stórtæk á þessu sviði er leitarsíðan Kayak en sú vísar í dag ekki beint á heimasíðu Play. Sama má segja um bókunarsíðuna Expedia því sú selur ekki flugmiða með hinu nýja íslenska flugfélagi.
Spurður um ástæðurnar fyrir þessu þá bendir Birgir Jónsson, forstjóri Play, á að aðeins sé einn og hálfur mánuður frá því að flugfélagið hóf miðasölu. Tæknileg innleiðing hjá Play og bókunarsíðunum taki sinn tíma. Hann segir þó ekki ætlunina að flugmiðar Play verði til sölu hjá hinum og þessum bókunarsíðum.
„Við erum að velja síðurnar vel og ætlum ekki að birtast þar sem við greiðum of mikið eða fáum ekki gögn um farþega og getum illa selt þeim viðbótarþjónustu. Við munum því ekkert endilega vera á öllum stöðum.“
Birgi bendir líka á að það sé einfaldara að semja við bókunarsíðurnar í dag þegar starfsemin er komin í gang og félagið sé vel fjármagnað. Samningsstaðan sé því betri núna en þegar félagið var ennþá aðeins viðskiptahugmynd.
Í ljósi þess að þóknun flugleitarsíðnanna er upp á nokkrar prósentur þá reyna flugfélög eftir fremsta magni að fá fólk til að bóka beint hjá sér.