Ungverska flugfélagið Wizz Air hefur verið stórtækt í Íslandsflugi síðustu ár og vetrardagskrá félagsins gerir ráð fyrir fleiri ferðum hingað en áður.
Þannig munu þotur félagsins meðal annars fljúga til Keflavíkurflugvallar frá fimm pólskum og þremur ítölskum. Auk þess eru á dagskrá ferðir frá Vínarborg, Dormunt, Búdapest, London og Riga.
Og nú í lok vikunnar bættust við ferðir frá Vilnius, höfuðborg Litháen. Flogið verður tvisvar í viku.
Wizz Air hélt þessari flugleið úti fyrir heimsfaraldur en hafði ekki sett hana á dagskrá á ný fyrr en núna.
Eins og útlitið er í dag þá verður Wizz Air áfram næst umsvifamesta flugfélagið á Keflavíkurflugvelli. Og bilið milli þess félags og easyJet breikkar því það síðarnefnda hefur skorið sitt flug til Keflavíkurflugvallar niður.