Dólgsháttur meðal flugfarþega er vaxandi vandamál í flugi vestanhafs og til að draga úr líkunum á þess háttar hegðun þá hætti American Airlines að bjóða upp á áfengi um borð fyrr í sumar.
Nú hafa stjórnendur flugfélagsins ákveðið að framlengja bann við neyslu áfengra drykkja í flugi félagsins fram yfir áramót. Þessi ákvörðun byggir á áframhaldandi grímuskyldu í flugi frá bandarískum flugvöllum samkvæmt frétt The Points Guy.
Fyrr í vikunni gaf Flugöryggisstofnun Bandaríkjanna það nefnilega út að núgildandi regla um grímunotkun yrði framlengd til 18. janúar á næsta ári. Tíðari ólæti meðal flugfarþega hafa verið rakin til óánægju með að þurfa að vera með grímur í háloftunum.