Hótel Borg, Nordica Hilton, Hótel Ísland og Hótel Natúra eru öll starfrækt í fasteignum í eigu Reita. Og frá og með fjórða ársfjórðungi reikna stjórnendur fasteignafélagsins með að leigutekjurnar af öllum hótelunum verði nálægt því sem var fyrir heimsfaraldurinn.
Þetta kemur fram í fjárfestakynningu sem birt var í síðustu viku í tengslum við síðasta uppgjör Reita.
Stærsti leigutakinn hjá Reitum eru Icelandair hótelin en þar fást engin svör um hvort raunhæft sé að fyrirtækið greiði fulla leigu frá og með þarnæstu mánaðamótum. Ekki fást heldur viðbrögð frá Keahótelunum sem leigja Hótel Borg af fasteignafélaginu.
Spurður hvort ferðaþjónustufyrirtæki séu í stakk búin til að greiða fulla leigu nú í lok árs þá segir Jóhannes Þór Skúlason, framkvæmdastjóri Samtaka ferðaþjónustunnar, að staðan og horfurnar gefi ekki til kynna að öll fyrirtæki í greininni geti það.
„Ég tel augljóst að áhrifa faraldursins gæti enn verulega í fjárhag fyrirtækjanna, í hótelrekstri sem og öðrum greinum ferðaþjónustu,“ bætir framkvæmdastjóri SAF við.
Þegar horft er til fjölda gistinátta á hótelum á höfuðborgarsvæðinu þá sést hversu langt er í að tölurnar verði álíka og var fyrir Covid-19. Á síðasta fjórðungi ársins 2019 voru gistinæturnar á hótelum í Reykjavík um 645 þúsund talsins.
Í júní og júlí sl. voru þær að jafnaði 110 þúsund á mánuði. Ferðamannastraumurinn til höfuðborgarinnar þarf því að era um tvöfalt meiri á síðasta fjórðungi ársins ef hótelnæturnar eiga að verða á pari við það sem var í hittifyrra.
Það sem vinnur þó með hótelunum er að framboð á gistirými í höfuðborginni er minna núna en það var. Ennþá hafa nefnilega ekki öll hótel opnað. Hlutdeild hótelanna sem Reitir leigja út gæti því verið hærri en áður. Markaðurinn mun þó taka töluverður breytingum í árslok þegar Marriott Edition opnar 253 herbergja fimm stjörnu hótel við Hörpu. Viðbúið er að sú viðbót setji pressu á verðskrár annarra hótel í borginni.