Fyrir heimsfaraldur skiptust Kaupmannahöfn og London á að vera í efsta sæti á listanum yfir þá áfangastaði sem oftast var flogið til frá Keflavíkurflugvelli.
Núna er framboðið aftur á móti mest þegar kemur að ferðum til New York jafnvel þó aðeins Bandaríkjamenn geti nýtt sér samgöngurnar.
Ennþá fá evrópskir ferðamenn nefnilega ekki að stíga fæti inn fyrir bandarísk landamæri. Daglega fljúga samt Boeing þotur Delta, Icelandair og United milli Keflavíkurflugvallar og þessarar fjölmennustu borgar Bandaríkjanna.
Ferðirnar til Kaupmannahafnar og London eru nærri helmingi færri núna en þær voru og þar með fara borgirnar tvær niður fyrir New York á listanum yfir þá áfangastaði sem oftast var flogið til í júlí.
Brottförunum til Boston hefur aftur á móti fjölgað frá því sem var og megin skýringin á því liggur í auknu Íslandsflugi Delta. Félagið býður núna í fyrsta sinn upp á áætlunarflug hingað frá Boston.
Samdráttur hefur orðið í fjölda ferða til annarra áfangastaða eins og sjá má á töflunni hér fyrir neðan.