Samhliða setu sinni í stjórn Icelandair þá rekur John F. Thomas flugfélagið Waltzing Matilda í Boston í Bandaríkjunum.
Í flota félagsins eru tvær flugvélar með sæti fyrir sjö farþega og eru þær leigðar út í einkaflug.
Thomas hyggst hins vegar auka umsvifin með því að hefja áætlunarflug frá Billy Bishop flugvelli í Toronto til Bandaríkjanna nú í október. Í þessa útgerð er ætlunin að nota Bombardier flugvélar líkt og Icelandair gerir í innanlandsflugi sínu.
Og nú hefur Waltzing Matilda leigt fyrstu tvær flugvélarnar sem notaðar verða í áætlunarflugið. Um er að ræða Bombardier Q400 flugvélar og verður sú fyrri afhent strax í næsta mánuði og sú seinni í nóvember samkvæmt frétt Flight Global.