Samfélagsmiðlar

Magurt ár hjá flugvélaframleiðendum

Valdimar Björnsson fer hér yfir stöðuna hjá flugvélaframleiðendum í ár. Afhendingar á þotum hafa dregist umtalsvert saman í heimsfaraldrinum.

„Miðað við afhendingartölur flugvéla í ár þá má búast við að 2021 verði hvorugum risanum gjöfult," segir Valdimar Björnsson í grein sinni.

Stærstu flugvélaframleiðendur heimsins, Boeing og Airbus, hafa afhent samtals 514 flugvélar fyrstu sjö mánuði ársins. Þessi fjöldi endurspeglar þá erfiðu stöðu sem ríkir í flugrekstri vegna Covid-19 hjá langflestum flugrekendum og þar með flugvélaframleiðendum. Ekki liggja fyrir tölur frá öðrum flugvélaframleiðendum sem af er árinu. 

Árið 2019 afhentu Boeing, Airbus, Embraer (Brasilíu), Bombardier (Kanada), Sukhoi (Rússlandi) og Comac (Kína) í allt sextán hundruð flugvélar og árið eftir voru þær um eitt þúsund. Fækkunin á milli þessara tveggja ára skýrist meðal annars af þeim vandræðum sem Boeing lenti í vegna hönnunargalla í MAX vélunum.

Eins og sjá má á línuritinu hér fyrir neðan þá fer Boeing frá því að vera með markaðsráðandi stöðu í að verða jafningi Airbus árið 2018. Tveimur árum síðar afhenti Airbus svo fleiri flugvélar en keppinauturinn og það sama á við sem af er þessu ári.

344 flugvélar hafa flogið frá verksmiðjum Airbus en 170 frá Boeing. Sá síðarnefndi hefur þó afhent ögn fleiri breiðþotur en keppinauturinn, 43 á móti 41.

Þegar afhendingatölur í ár eru skoðaðar nánar þá kemur í ljós að Airbus hefur afhent fleiri flugvélar í öllum mánuðum ársins en Boeing ef janúar er undanskilinn.

Southwest er það flugfélag sem hefur fengið flestar Boeing vélar það sem af er ári eða alls nítján, allt 737 MAX. United Airlines er með næst flestar þotur eða ellefu eintök, bæði 737 MAX og Dreamliner. Jafn margar hafa farið til Ryanair og þar af níu 737 MAX vélar nú í júlí.

Boeing hefur afhent alls 127 MAX þotur í ár og nemur það þremur fjórðu af öllum þeim flugvélum sem Boeing hefur afhent flugfélögum í ár.

Hjá Airbus þá er það Delta Air Lines sem hefur fengið flestar þotur í ár eða 25. Þar af sextán A321ceo vélar. Þar á eftir kemur China Eastern Airlines með átján vélar.

Airbus hefur afhent mest af A320 neo flugvélum í ár eða alls 147. Þar á eftir koma 112 A321 neo. Airbus afhenti þrjár A320neo vélar til Spirit og þrjár A321neo vélar til Wizz Air í júli í ár.

Vinsældir flugvéla með minna drægi, færri sætum og með einn gang („narrowbody“), skýrist að miklu leiti af innanlandsflugi í landfræðilega víðfeðmu löndunum. Eftirspurn eftir innanlandsflugi í Bandaríkjunum og Kína hefur verið meiri en í millilandaflugi í faraldrinum.

Til að átta sig á stærð félaganna tveggja þá var samanlögð heildarvelta þeirra í fyrra 15.207 milljarðar króna, umreiknað í krónur á loka gengi ársins. Þetta eru tuttugufaldar áætlaðar skatttekjur íslenska ríkisins.

Samanlagður starfsmannafjöldi Boeing og Airbus telur 272.363 manns eða 74 prósent af íbúum Íslands. Bæði félögin skiluðu tapi á síðasta ári og var afkoma Boeing meira en áttfalt lakari en hjá Airbus.

Airbus tapaði 182 milljörðum árið 2020 en bandaríski keppinauturinn 1.524 milljörðum. Miðað við afhendingartölur flugvéla í ár, samanborið við árið 2020, þá má búast við að 2021 verði hvorugum risanum gjöfult.  

Um höfundinn: Valdimar Björnsson er flugvélaverkfræðingur með einkaflugmannspróf og hefur lokið áfanga í flugslysarannsóknum. Hann er með MBA gráðu með áherslu á flugrekstur og hefur starfað hjá Icelandair, Icelandair Cargo og Primera Air.

Nýtt efni

Mitt inn í dimmum Grünheideskógi skammt frá Berlín hafa 80 manneskjur komið sér fyrir í kofum sem þau hafa byggt hátt uppi trjánum. Kofaþorpið eru bækistöðvar mótmælenda eða aðgerðarsinna eins og þau kalla sig. Einmitt inni í þessum sama skógi hyggst bandaríski rafmagnsbílaframleiðandinn Tesla stækka svokallaða gígaverksmiðju sem var tekin var í notkun í mars …

Lufthansa hefur náð samkomulagi við verkalýðsfélagið Verdi og þar með er endi bundinn á langa vinnudeilu við flugvallarstarfsfólk þýska flugfélagsins. Flugáætlun Lufthansa fer því ekki úr skorðum yfir páskana líkt og útlit var fyrir en félagið er með þrjár flugferðir til Íslands á áætlun sinni yfir hátíðarnar. Hinn nýi samningur Verdi og Lufthansa kemur í …

Það voru 561 þúsund skráðar gistinætur hér á landi í febrúar sem er um 2,5 prósent samdráttur í samanburði sama tímabil í fyrra. Ef tekið er tillit til hlaupársdagsins þá var fækkunin ennþá meiri eða nærri 6 af hundraði. Á hótelum landsins voru gistinæturnar 373 þúsund sem er ögn meira en í febrúar í fyrra …

Þegar Hagstofan leggur mat á breytingar á verðlagi þá er meðal annars horft til fargjalda, bæði í flug innanlands og til útlanda. Samkvæmt nýjum verðmælingum Hagstofunnar þá lækkaði farið frá Keflavíkurflugvelli um 5 prósent í mars en farþegar í innanlandsflugi þurftu að borga 16 prósent meira en í fyrra. Á sama tíma hækkaði verðlag í …

„Undanfarna mánuði hafa stjórnmálamenn og verkalýðsforingjar viðrað hugmyndir um að hækka virðisaukaskattshlutfall ferðaþjónustu í 24%. Almenn greining á grundvelli viðtekinnar þjóðhagfræði, sem SAF hefur látið vinna, bendir til þess að slík hækkun myndi almennt hækka verðlag og þar með verðbólgu á viðkomandi ári, lækka veltu í ferðaþjónustu, veikja samkeppnishæfni hennar, lækka verga landsframleiðslu og auka …

Xiaomi er hraðvaxta hátæknifyrirtæki í Beijing í Kína, stofnað fyrir 14 árum af frumkvöðlinum og milljarðamæringnum Lei Jun og félögum hans. Á síðasta ári var fyrirtækið í þriðja sæti á lista þeirra sem seldu flesta farsímana - næst á eftir Samsung og Apple. Xiaomi framleiðir og selur margskonar annan háþróaðan tæknibúnað og neytendavörur en samdráttur …

Fyrir rúmu ári var greint frá því að þýska Lufthansa-samsteypan hefði áhuga á að kaupa 40 prósenta hlut í ítalska þjóðarflugfélaginu ITA en niðurstaða hefur ekki enn fengist. Í janúar hóf Framkvæmdastjórn Evrópusambandsins rannsókn á samkeppnisáhrifum þess að Þjóðverjarnir eignuðust stóran hlut í ítalska flugfélaginu sem lengi hefur verið stjórnvöldum á Ítalíu höfuðverkur.  Nú í …

Fyrir mánuði sendi Storytel frá sér fréttatilkynningu þar sem kynnt var ný þjónusta fyrir notendur. Brátt eiga hlustendur hljóðbóka möguleika á að velja nýjan lesara ef þeim líkar ekki innlesturinn. Valraddirnar eru allar skapaðar af vélmennum eða svokölluðum gervigreindarupplesurum.  Þetta nýja verkfæri Stoyrtel er tekið í gagnið vegna þess að 89 prósent af þeim sem …