Ferðafólki hér á landi snarfækkaði í mars í fyrra þegar Covid-19 faraldurinn hófst af fullum þunga. Mörg hótel í höfuðborginni skelltu þá í lás en Radisson 1919 var áfram opið.
Tekjur hótelsins á öðrum ársfjórðungi í fyrra voru samt sáralitlar eða átta milljónir króna á meðan rekstrarkostnaðurinn nam 63 milljónum kr.
Ferðamannastraumurinn á öðrum fjórðungi í ár var hins vegar miklu þyngri en í fyrra og tekjur Radisson 1919 fóru upp í 64 milljónir króna á fjórðungnum. Kostnaðurinn lækkaði í 57 milljónir kr. samkvæmt því sem má lesa út úr uppgjörum fasteignafélagsins Eikar sem er eigandi hótelsins við Tryggvagötu.
En þó umsvifin hafi aukist þá eru þau töluvert frá því sem var fyrir Covid-19 faraldurinn. Því eins og sjá má á grafinu hér fyrir neðan þá voru tekjur Radisson 1919 ríflega tvöfalt hærri á öðrum fjórðungi 2019 en þær voru á sama tíma í ár.