Nú þegar rekstur bandarísku hótelkeðjunnar Hyatt er að komast í jafnvægi á ný í heimalandinu þá hafa stjórnendur fyrirtækisins dustað rykið af metnaðarfullum áformum um opnun fjölda hótel í Evrópu.
Og á fundi með fjárfestum í byrjun mánaðar lýsti forstjóri hótelkeðjunnar því yfir að nú væri rétt tíminn til að tryggja sér hótelfasteignir hinum megin við Atlantshafið.
Hér á landi hefur Hyatt, í samstarfi við fasteignafélagið Reiti, unnið að opnun 172 herbergja hótels í gamla sjónvarpshúsinu við Laugaveg 176. Verkefninu var þó slegið á frest vegna Covid faraldursins.
Umræður um framgang og endurskoðaða opnunardagsetningu hefjast hins vegar nú í haust staðfestir Guðjón Auðunsson, forstjóri Reita.
Og hjá hótelkeðjunni sjálfir ríkir eftirvænting fyrir verkefninu hér á landi.
„Við hlökkum til að opna fyrsta hótelið okkar á Íslandi og það verður mikilvægur áfangi í stækkunaráformum Hyatt,“ segir talsmaður fyrirtækisins í svari til Túrista.
Sem fyrr segir er ætlunin að opna Hyatt hótelið í gamla sjónvarpshúsinu við Laugaveg og segir Guðjón, forstjóri Reita, að enn sé horft til þeirra fasteignar undir starfsemi hótelsins.
Útleiga á fasteignum til hótelreksturs er stór hluti af umsvifum Reita. Þannig eru hótelbyggingar meðal fimm af tíu verðmætustu eignum fyrirtækisins og leigan á þeim stendur undir fimmtungi tekna fasteignafélagsins samkvæmt síðasta ársuppgjöri.
