Þrátt fyrir að Pólland sé einn stærsti markaðurinn fyrir Íslandsflug þá hefur Icelandair ekki spreytt sig þar. Wizz Air situr því eitt að flugi milli Íslands og Póllands en hingað fljúga þotur félagsins frá fimm pólskum borgum.
Nú ætla stjórnendur Play hins vegar að tékka á Póllandi því félagið hefur sett í sölu flug til Varsjár á Þorláksmessu og aftur þann 3. janúar. Fleiri ferðir eru ekki komnar á dagskrá en Nadine Guðrún Yaghi, upplýsingafulltrúi Play, segir í svari til Túrista að verið sé að skoða Pólland sem áfangastað, ásamt mörgum öðrum. „Enda mikil fjölgun véla á dagskrá á næstunni,“ bætir hún við.
Nýverið tók Play við þriðju Airbus A321neo þotunni og áður hefur komið fram að félagið stefni á að vera með sex þotur í rekstri næsta vor. Samhliða því er ætlunin að hefja flug til Norður-Ameríku.
Wow Air og þar á undan Iceland Express voru lengi með á boðstólum flug til Póllands. Það var þó áður en Wizz Air hóf að fljúga hingað til lands. Fyrsta ferð Iceland Express til höfuðborgar Póllands var sumarið 2008 en þá var Birgir Jónsson, forstjóri Play, hættur störfum sem framkvæmdastjóri þess félags.
