Það eru átta Boeing 737 þotur í flota fraktflugfélagsins Bláfugls í dag en þær verða að öllu óbreyttu orðnar þrjátíu og þrjár talsins árið 2024. Félagið áformar nefnilega að leigja tuttugu og fimm Boeing 737-800 þotur en sú tegund getur flutt fjórum tonnum meira en eldri Boeing 737 fraktflugvélar ráða við.
Í tilkynningu frá Avia Solutions Group, eiganda Bláfugls, er haft eftir Sigurði Ágústssyni, forstjóra Bláfugls, að aukin eftirspurn eftir fraktflutningum nú í heimsfaraldrinum sé ein helst ástæðan fyrir þessum breytingum.
Spurður hvort umsvif Bláfugls í fraktflugi til og frá Íslandi muni aukast að sama skapi, þá bendir Sigurður á, í svari til Túrista, að sá hluti sé í raun lítill partur af starfseminni. „Flug Bláfugls sem tengjast Íslandi hafa verið um sjö til átta prósent af heildarflugi félagsins síðustu tvö ár.“
Það þarf engu að síður að bæta við mannskap hjá fyrirtækinu hér á landi í tengslum við stækkunina að sögn Sigurðar. Eins verða allar nýju þoturnar skráðar hér á landi.
Fyrsta nýja Boeing 737-800 verður afhent Bláfugli strax í næsta mánuði og sú næsta í október. Báðar þoturnar leigir Bláfugl af leigumiðluninni AviaAM sem einnig tilheyrir Avia Solutions Group.