Norska flugfélagið Flyr birti sitt fyrsta uppgjör í síðustu viku og niðurstaðan fyrir annan ársfjórðung var tap upp á 65 milljónir norskra króna. Það jafngildir um 920 milljónum íslenskra króna.
Þetta uppgjör Flyr gaf þó ekki góða mynd af rekstrinum því áætlunarflug félagsins hófst fyrst í lok júní. Tekjurnar á öðrum ársfjórðungi voru því sáralitlar.
Engu að síður tóku fjárfestar í Noregi þessu uppgjöri heldur illa því gengi hlutabréfa í félaginu lækkaði hratt og endaði í 4,33 norskum krónum á hlut. Í hlutabréfaútboði félagsins í ársbyrjun var útboðsgengið aftur á móti 5 norskar krónur. Það hækkaði svo hratt í byrjun viðskipta í mars en hefur verið á hægri niðurleið síðan.
Það kom fram í máli stjórnenda Flyr á afkomufundinum að farþegar bóki farmiða í dag með mjög stuttum fyrirvara. Það sé því erfitt að meta stöðuna fram í tímann.
Eins og sjá má á grafinu hér fyrir neðan þá þróaðist gengi annarra skráðra norrænna flugfélaga með ólíkum hætti í vikunni.
Í tilfelli Play þá vakti það þó athygli að viðskipti með bréf félagsins voru óvenju mikil á fimmtudaginn. Þá nam veltan með bréfin rúmum eitt hundrað milljónum en var á bilinu 2 til 3 milljónir hina viðskiptadaga vikunnar.
