Stór hluti af starfsemi Finnair snýst um að fljúga farþegum til og frá Asíu en umsvifin á þeim markaði eru miklu minni núna en áður. Á sama tíma er óljóst hvenær ferðamenn fara að streyma á milli Evrópu og Kína, Japan og S-Kóreu á nýjan leik.
Þrátt fyrir þessa stöðu var Finnair það félag sem hækkaði mest af þeim sex norrænu flugfélögum sem skráð eru í kauphallir í vikunni sem nú er senn á enda.
Þar á eftir kom Play en félagið birti í vikunni sitt fyrsta uppgjör eftir hlutafjárútboð sumarsins. Uppgjörið gaf þó skiljanlega takmarkaðar upplýsingar um hverjar tekjur félagsins voru á hvern floginn kílómetra. Félagið hóf nefnilega ekki áætlunarflug fyrr en í síðustu viku uppgjörstímabilsins. Þar með verður að bíða lengur eftir því að sjá hvernig þessi mikilvægi mælikvarði kemur út hjá félaginu og sömuleiðis kostnaður á hvern kílómetra.