Þó Íslendingum hafi lengi þótt Saga Class fínasta fínt þá sýnir reynslan að auðugir ferðamenn hafa sett það fyrir sig að ferðast til Íslands af þeirri ástæðu að besta farrýmið hjá Icelandair þykir ekki nógu gott. Á þetta hefur bandarískur forsprakki hótelbyggingarinnar við Hörpu líka bent. Sá sér meðal annars tækifæri í opnun fimm stjörnu hótels í Reykjavík þar sem betur borgandi ferðamenn geta nú flogið hingað á fyrsta farrými með Delta og United.
Og segja má að Saga Class fái heldur neikvæða umsögn hjá ritstjóra bandaríska ferðavefsins Points Guy. Sá flaug nýverið með Icelandair frá New York og kemst að þeirri niðurstöðu að Saga Class sé líklega lakasta viðskiptafarrými sem í boði er í flugi yfir Norður-Atlantshafið. Þjónustan sé vissulega í anda þess sem þekkist á viðskiptafarrýmum en sætin eigi frekar heima aftar í vélinni.
Bandaríski ritstjórinn telur að í raun séu bara tvær ástæður fyrir því að kaupa miða á Saga Class. Í fyrsta lagi eru það lágu fargjöldin sem Icelandair sé reglulega með á boðstólum vestanhafs. Af þeim sökum kosti í raun sæti á Saga Class álíka mikið og önnur flugfélög rukka fyrir betri sætin á almennu farrými (Premium Economy). Ferðalag til Íslands er svo seinni ástæðan fyrir því að velja Saga Class að mati Points Guy.
Í umsögn Points Guy fær þráðlausa netið hjá Icelandair þó lof og einnig aðbúnaðurinn í nýju MAX þotunum. Ritstjórinn bendir því lesendum sínum á að fljúga heldur frá Newark flugvelli en JFK ef ferðinni er heitið frá New York til Íslands. Skýringin er sú að Icelandair nýtir oftar Boeing MAX þotur í flugið til þess fyrrnefnda á meðan gamlar Boeing 767 breiðþotur fljúga til og frá JFK. Að ganga um borð í þess háttar þotur er eins og fara aftur í tímann segir ritstjórinn.
Á það má hins vegar benda á að Boeing 767 þoturnar sem Delta flugfélagið nýtir í Íslandsflug sitt frá JFK flugvelli eru líka komnar til ára sinna. Þotan sem lenti á Keflavíkurflugvelli í morgun var til að mynda framleidd árið 1998 á meðan Icelandair þotan sem kom hingað í morgun frá sama flugvelli er tveimur árum yngri. Icelandair er reyndar áttunda flugfélagið sem notar þá þotu á meðan Delta flugvélin hefur alltaf verið í flota bandaríska flugfélagsins.
—–
30 daga áskrift á 300 krónur.
Stór hluti af greinum Túrista er aðeins fyrir áskrifendur. Þú færð fullan aðgang í 30 daga fyrir aðeins 300 kr með því að nota afsláttarkóðann „300“ þegar þú pantar áskrift hér. Að þeim tíma loknum er greitt fullt gjald en alltaf hægt að segja áskriftinni upp.