Malasíska fyrirtækjasamsteypan Berjaya eignaðist Icelandair hótelin að öllu leyti í febrúar sl. þegar gengið frá kaupsamningi á eftirstandandi hlut Icelandair Group í hótelkeðjunni. Þrjú af hótelunum eru í fasteignum sem tilheyra Reitum.
Það er Nordica Hilton við Suðurlandsbraut, Natúra við Reykjavíkurflugvöll og Alda hótel við Laugaveg.
Viðræður um vangoldna leigu Icelandair hótelanna við Reiti standa nú yfir líkt og fram kom á fjárfestafundi fasteignafélagsins í síðustu viku.
Gerðu samkomulag um ábyrgðir
Icelandair Group er þó ekki aðili að þessum samningaviðræðum. Þetta kemur fram í svari frá flugfélaginu við fyrirspurn Túrista. Þar var spurt hvort Icelandair ætti hagsmuna að gæta af þessum viðræðum, t.d. vegna ábyrgða á leigusamningum sem gerðir voru þegar hótelin tilheyrðu samsteypunni.
Í svarinu segir að gert hafi verið samkomulag við Berjaya um frágang ábyrgðanna en nákvæmt innihald þess samkomulags sé trúnaðarmál.
Í því samhengi má rifja upp að fyrr í sumar var Icelandair Group dæmt í héraðsdómi til að greiða 145 milljónir króna vegna leiguskuldar Icelandair hótelanna við eigenda húsnæðis Konsúlat hótelsins í Tryggvagötu. Þeim dómi áfrýjaði Icelandair Group en málið hefur ekki verið tekið fyrir í Landsrétti.
Keyptu skrifstofurnar á 2,3 milljarða króna
Sem fyrr segir þá eiga Reitir fasteignina sem Natúra hótelið við Reykjavíkurflugvöll er í. Sambyggt hótelinu eru skrifstofur Icelandair og um síðustu áramót keyptu Reitir þann hluta byggingarinnar á 2,3 milljarða króna af flugfélaginu.
Ætlunin er að skrifstofur Icelandair flytjist til Hafnarfjarðar á næstu árum. Salan á skrifstofubyggingunni er þó ótengd fyrrnefndum leiguábyrgðum og hótelviðskiptunum samkvæmt svari frá Icelandair.