Það voru 439 þúsund gistinætur á hótelum landsins í ágúst sem er samdráttur um 16 prósent frá sama tíma árið 2019. Þróunin á milli þessara tímabila var engu að síður jákvæð í þremur landshlutum.
Á Norðurlandi voru gistinæturnar til að mynda 56 þúsund talsins eða tíund fleiri en í ágúst 2019. Viðbótin var ekki eins mikil á Vesturlandi og Vestfjörðum því þar nam hún tveimur af hundraði og á Austurlandi fjölgaði hótelnóttunum um eitt prósent.
Aftur á móti fækkaði gistinóttum á hótelum höfuðborgarinnar um fjórðung, um fimmtung á Suðurnesjum og tólf prósent á Suðurlandi líkt og sjá má hér fyrir neðan.
Skýringin á þessum mismun liggur í fjölda íslenskra gesta því erlendum hótelgestum fækkaði í öllum landshlutum á bilinu 30 til 38 prósent nema á Norðurlandi. Þar voru útlensku gestirnir 14 prósent færri en í ágúst 2019.
Íslendingar sjálfir sóttu hins vegar miklu frekar í hótelgistingu í ágúst en þeir gerðu á sama tíma í hittifyrra. Langmest var viðbótin á Austurlandi þar sem hún var fjórföld og nærri þreföld var hún á Suðurlandi. Minnst bættu íslensku gestirnar hins vegar við sig á hótelum í Reykjavík, Vesturlandi og Vestfjörðum en aukningin var engu að síður nærri tvöföld.